گئرمي نيوز فرق‌لي بير وئبلاگ يئني نسليميز اوچون *** گرمي نيوز وبلاگي متفاوت براي نسل جديد
روز ملی شعر و ادب [فارسی!!!] / ملانصرالدین

روز ملی شعر و ادب [فارسی!!!] / ملانصرالدین

یازار : گئرمي‌لي

+0 به یه ن
گرمی نیوز:

27 - شهریور شهریارین وفاتی نین ایل دؤنومو موناسبتینه...

هوپ هوپ نه توءرك پرستدیر، نه پان توءرك، آمّا...

شاه شاعر، شاه اثرلر:

بو گوءن بیر بؤیوك شاعرین وفاتی نین ایل دؤنومودور. بو شاعر، آذربایجان ادبیّاتیندا بیر انقلابچی كیمی تانینیر. اونون شعرلری اؤلو ادبیاتیمیزی جانلاندیریب و یئنی دن اونا نفس وئردی. پهلوی دؤرونده كی قورخولو دؤره ده اولان قاداغالار قاباغیندا، طاقتینی الدن وئرن آذربایجان دیلی حیاتینی چتینلیك له داواملایان زاماندا بو شاعرین بؤیوك و قودرتلی شعری بیر یئنی اومید ایشیغی كیمی آذربایجاندا ایشیقلاندی و آذربایجانین خسته دیلینه حیات قایتاردی.

شهریار آدی ایله تانینان، سید محمّد حسین بهجت تبریزی، فارس ادبیاتیندا دا بؤیوك بیر شاعر تانینسا دا، اؤز آنا دیلینده یازدیغی شعرلر شك سیز، فارس دیللی شعرلریندن آرتیق اهمّیته مالكدیر.

شهریارین حیدربابایا سلام پوئماسی آذربایجان ادبیاتیندا بیر یئنی ادبی ژانر (سبك) كیمی اؤزونو گؤستردی و تئزلیكجه ایراندان علاوه، شمالی آذربایجان، عراق، توركیه و باشقا تورك دیللی ملّت لر آراسیندا یاییلدی. ایرانین فارس دیللی لری تكجه بو شعری دوشونمك اوچون تورك دیلینی اؤیرنمگه باشلادیلار. اونلارجا یابانجی دیللره چئوریلدی شهریارین حیدربابایا سلام پوئماسی...

آمّا من داها آرتیق سئودیگیم شعر، شهریارین سهندیّه پوئماسی دیر. بو پوئما شهریارین باشقا شاه اثری اولسا دا، بعضی ادبیّاتچی لارجا، حیدربابادان اوستون اولسا دا، ایران آذربایجانلی لاری آراسیندا چوخ دا تانینمیش بیر اثر دئییل.

سهندیه ده اولان تصویرلر، شهریارین شعرلرینده اولان ان گؤزل تصویرلردیر. شهریار اؤزو بو شعره گؤره دئمیشدی كی: "شعر دئمك شاعرین اؤز اختیاریندا دئییل و اگر بئله اولسایدی من هر گوءن بیر سهندیه یازاردیم، آمّا بو مسأله بو قدر ده راحت دئییل. شاعر بیر اثر و خصوصیجه شاه اثر یاراداندا وصفه گلمز بیر حالا گئدیر."

ملّی [فارسجا!!] شعر و ادب گوءنو...

اون ایل بوندان اوّل، شهریارین وفاتی نین ایل دؤنومو ایران اسلامی شورا مجلسینده، "روز ملی شعر و ادب" آدلاندی. آمّا تقویم لرده بو آد بئله تكمیل لشدی!! "روز ملی شعر و ادب فارسی".

من كی بیلمیرم "فارسی" كلمه سینی آرایا گتیرمگین علّتی نه دیر. آمّا بونو بیلیرم كی، بو ایش شهریارین آنا دیلینده یازان شاه اثرلرینه آغیز-بورون اگمك كیمی قیمتلنه بیلر. بئله بیر گوءن تقویمه لازم اولسا دا باشقا بیر شاعرین ایل دؤنومونه داها آرتیق لایقدیر. آمّا شهریار فارس دیلی نی دیكلتمكدن آرتیق ایراندا اولان موختلف فرهنگ لری یاخینلاشدیران بیر شخصیت كیمی گؤرونه بیلر. همین بو شخصیتی بیر فرهنگین نفعینه موصادره ائتمك، بؤیوك و چوخ فرهنگلی ایراندان بیر بؤیوك بیرلیك فورصتینی آلماق معناسیندادیر.

http://nasraddin.blogfa.com/post/91





سون یازیلار

گئرمي نيوز فرق‌لي بير وئبلاگ يئني نسليميز اوچون *** گرمي نيوز وبلاگي متفاوت براي نسل جديد

گرمي نيوز، فرق‌لي باخيش