"انجمن مجازی شعر شهرستان گرمی" (محفلك) له تانیشلیق
یازار : گئرمي‌لي
+0 به یه ن
گرمی نیوز:
بحثه گیرمه‌دن اونجه بیر نوكته‌نی خاطیرلادیم، اودا انجومنین آدی باره‌سینده‌دیر. بیلدییمیز كیمین بولگه‌نین آدی "مغان (گرمی)" دیر. بونا اساسن انجومنین آدی "انجمن مجازی شعر شهرستان مغان (گرمی)" اولمالی‌دیر.
آنجاق محفلك
هارادیر؟ محفلك‌چی‌لر نه ایش‌نن مشقول‌دورلار و....
دئمك اولار كی
ایران‌دا تورك-فارس وئب دونیاسیندا گزیلرسه شعر قونوسوندا "محفلك"
وئبیندن قودرت‌لی، نظم‌لی، دولغون و زنگین وئب تاپماق چتین بیر ایش‌دیر. بو بیر
شیشدیرمه دئییل سئویندیریجی بیر گئرچك‌دیر. محفلك اینتئرنئت دونیاسیندا شعر
قونوسوندا چالیشان ان گوجلو وئب‌لردن‌دیر. بو وئب موغان بولگه‌سی‌نین بیر نئچه
گنج شاعیری‌نین چالیشماسی‌لا یاییلیر و بونون بویوك ائتگی‌لری گله‌جك‌لرده داها
چوخ گوزه گله‌جك.
من بیر شاعیر و
یا ادبییات‌چی اولماسام‌دا بو قونونو یاخین‌دان ایزله‌ییرم و اوز بیلگیلریم
اساسیندا بو باره‌ده یازاجاغام، بللی‌دیر كی یازی‌لاردا اولان یانلیش‌لیق‌لار
قاچیریلمازدیر.
منجه موغان بولگه‌سی‌نده
شعرین گلیشمه‌سین اوچ بویوك حیصصه‌یه بولمك اولار. بیرینجی دوورو سوننتی دوور
آدلاندیرماق اولار. بو دوورده شعرلر عومومن شفاهی صورت‌ده دئییلیب، بیركند و یا
محله‌نین ییغیناجاق یئرلرینده اوخونوردو. بو شعرلر شاعیرین الی‌له كاغیذ اوستونده
یازیلسالاردا عومومن هئچ بیر یئرده رسمی صورت‌ده یاییلمیردی. بو دوورلاردا كیتاب
یایماق اوزو چتین و نادیر بیر ایش‌ایدی، چونكو چاپ ایمكانات‌لاری ائله‌ده گئنیش
دئییل‌ایدی. شاعیرلر بیر-بیرینن ائله تانیش دئییل‌دی‌لر و هر كس اوز كندلرینده –
شهرلرینده اولان شاعیری تانیییردی. شعرین موضوع‌سونا گلدیكجه، گونده‌لیك مساله‌لر،
دوغال (طبیعت)، و یا مجازی یارین گوزلری و قارا خالی شعرین موحتواسین تشكیل
ائدیردی.
ایكینجی مرحله
چاپا وئریلمیش اثرلرله تانینا بیلر. بو دونم‌ده شاعیرلرین ایلگی‌لری بیر-بیرلری‌له
گئنیش‌لنمه‌یه باشلادی و موختلیف كیتاب‌لار اوزه چیخدی. دئمك اولار كی بو دوورون
موضوع‌لاری و شعرین محتواسی اوول دوورنان ائله‌ده فرق‌لی دئییل شعرلرده عومومن كلاسیك
صورت‌ده یاییلیرلار.
سون 10-15 ایل‌ده
موغان بولگه‌سی‌نین شعر گلیشمه‌سینده بویوك بیر ایره‌لیلیش باش وئرمه‌یی عیان‌دیر.
بیلیم‌یوردلارین گئنیش‌لنمه‌سی باعیث اولدو كی موغان‌دان‌دا چوخ‌لو اویرنجی‌لر
آیری شهرلره سپه‌لنسین‌لر. بو سپه‌لنمه ایكی یون‌دن شعرین گلیشمه‌سیندن اونملی
سایی‌لا بیلر. ایلك اونجه شاعیر باشقا چئوره و موحیط‌لرله تانیش اولوب،
"اوزگه‌لری" گوردوكجه قاییدیب یئنی‌دن "اوزونه" باخماغا مجبور
اولوب‌دور. بو قاییدیش‌دا درین بیر "اویانیش" باش وئره بیلیر. اینسان
اوزونه یئنی‌دن باخیب، اوزوایله، عاییله‌سی‌له، كندی‌له، شهری‌له، جاماعاتی‌له
و... یئنی‌دن تانیش اولماق ایمكانی یارادیلیر. ایكینجی‌سی ایططیلاعاتین گلیشمه‌سی
باعیث اولوب كی شاعیر دونیا ادبیاتی، بویوك شاعیرلر و... تانیش اولماق‌دا هئچ بیر
چتین‌لیك چكمه‌سین. او بیری طرف‌دن اینتئرنئت دونیاسیندا اولان ایمكان‌لار باعیث
اولوب كی اینسان‌لار ائولرینده اه‌یلشه-اه‌یلشه بیر-بیرینن ایلگی قورا بیلسین‌لر.
شعرلرین موضوع‌سو
سورعت‌له گئنیش‌له‌نیب‌دیر. ایندی چئشیدلی قونولاردا شعرلر تاپماق ائله‌ده چتین
ایش دئییل. شاعیرلر گنج اولدوق‌لاری اوچون شعرلر جسارت‌له دولودور، سینیرلار ائله‌ده
اونملی دئییل. شعر قونوسونون گئنیشلنمه‌یینه باخمایاراق هله‌ده یارین گوزل گوزلری
شاعیرلریمیزین باش‌لارینا چوخ‌لو اویون‌لار آچیر! بونا باخمایاراق بو اویون آچماق‌لار
اینتیزاعی بیر مضمون یوخ، گئرچك‌لرله دولو، جسارت‌له دولو بیر شعر یارادیلماسینا
باعیث اولورلار.
دئمك اولار كی "انجمن
مجازی شعر شهرستان گرمی" (محلفلك) اوچونجو دوورانین یئتیشدیردیی
لاییق‌لی نوماینده‌لری‌نین سونوجودور.
سون‌دا دئمك لازیم‌دیر
كی بیر شهرین یازیچی‌لاری، آراشدیریجی‌لاری، شاعیرلری و... او شهرین هویتی-فرهنگی
آبروسودورلار. منطقه‌نین مسئول‌لاری‌نا واجیب‌دیر كی بو گنج‌لردن حیمایه ائدیب،
یاردیم‌لارین اونلاردان اسیرگه‌مه‌سین‌لر.
سون‌دا آرزو
ائدیریك كی بیر گون ادبیات‌ین گوجلو قولو اولان نثریمیزده شعریمیز كیمین گوج‌لنیب
گوجلو اثرلر یارادان یازیچی‌لاریمیز اورتایا چیخسین.
انجومن‌ده اویه اولان شاعیرلر:
انجومنین وئبلاگینا گیرمك اوچون آشاغیداكی لینك اوستونده كلیك ائدین:
سون یازیلار
