گرمی نیوز

گرمی نیوز:

بیر گوزل شعر تایماز اوجاق‌لی‌دان عزیز اوخوجولارا سونورلور.

ساغلیق‌سیز ایچگی‌لر

ایچگی‌سیز ساغلیق‌لار

خط‌سیز كاغیذلار

كاغاذسیز یازیلار

                                    اوراغلار گزیشیر بوغدالیقلاری

من نه هایدا !؟

سن نه هایدا !؟

یوموشاق دانیشیق

خنجرلی باخیش‌لار

دیلكلی ناخیش‌لار

ناخیش‌لی دیرناقلار

                             گیوتین قوخلاییر یاشیل باش‌لاری

من نه هایدا !؟

سن نه هایدا !؟

شعریمیز دوزن‌سیز

آبارتمیش یالانلار

آیاقسیز قالانلار

قالارقی ساتان‌لار

                               سوله‌نیر كؤپكلر قبریستانلاری

من نه هایدا !؟

سن نه هایدا !؟

بوزلامیش گئجه‌لر

بوغونتو هاوالار

هاوالار باشلاردا

آدامسیز‌ حاوالار

        شیطانلار اوچورور جنت اؤلكه‌نی

من نه هایدا !؟

سن نه هایدا !؟