آرواد وكیل اولدوم، كئفیمیز سازدی بو گوءن / ملانصرالدین
یازار : گئرمي‌لي
+0 به یه ن
بو گوءن ملاّ نصرالدّینی گؤردوم. ائششگی نین اوءستونده ترسه اوتورموشدو شهرك طرفیندن گرمیه ساری گلیردی. دئدیم: ملاّ نصی نیه بئله سن؟؟؟ ائشیتمه دی، یولونو دوءز دوتوب گئتدی. یئنه ده داها اوجادان چیغیردیم: ملاّ نصی... ائله بیل كی یوخودان دیك آتیلا قاییدیب منه باخدی، آمّا هئچ نه دئمه دی. بیلدیم كی، حالی چوخ خارابدی. سوروشدوم: نه اولوب سنه؟!! - هئیی... دردیمین هاراسیندان دئییم؟ من گوءلگزه (ائو آدامینا) دئدیم آ، قوی یازیلیم انتخاباتا، بلكه وكیل اولدوم. دئدی یوخ... - یاخشی... به نیه ایندی یادیوا دوءشوب؟؟ - مجلسده نه خبر اولدوغونو ائشیتمه ییبسن؟؟ - مجلس هارا، من كیمی بدباخت بئچارالار هارا. نیه گرك ائشیدم؟؟ - اودو دای... مجلسده كی لرین هره سینه ۴۵۰ میلیون پول وئریلنده یانیب تؤكولرم دای. بیلرسن كی، من یازیلسایدیم، حتما وكیل اولاردیم. مردومون هامی سی منی تانیییر. وكیل اولسایدیم دا، چؤرگیم یاغلی اولاردی. اینانمیرسان آلتداكی لینكه كلیك ائله: |
|
|
بئله بیلیرم باشینا هاوا گلمیشدی ملاّ نصرالدّینین. بو شعری اوخویا اوخویا اوزاقلاشیردی:
| آرواد وكیل اولدوم، كئفیمیز سازدی بو گوءن
ایشمیز هامیسی ساز ایله آوازدی بو گوءن
من مجلسه گئتدیم پولا دای پول دئمرم طالع منه میلیونلو حقوق یازدی بو گوءن
بیر گوءن گئدریك گزمگه استانبولا بیز امّا كی سفر مقصدی اهوازدی بو گوءن
دور پالتاری گئی تا كی گئدك رستورانا هر ساده یئمك خانه بیزه آزدی بو گوءن
شاندیز كی دئییرلر باهادیر باش بیلیطی هئچ غم یئمه كی، دروازاسی بازدی بو گوءن
هئچ غم یئمه كی، دؤره سی قورتاردی غمین قیش كئچدی گوءل آچدی گؤزلیم، یازدی بو گوءن
آللاّه آمان آللاّه، كئف ایچینده اؤلورم هئچ خواب و خیالیمدا دا اولمازدی بوءگون
وای وای كی فلانكس نه قدر خرج ائله دی غم غوصّه تؤكوب توءك لری نی دازدی بو گوءن
ملّت نئچه دیر بیر كیلوسو، بوشلا جانیم تكجه من اوءچون جیبده كی پول نازدی بو گوءن
كیم سورسا وكیل هاردادیر آرواد دئمه ها!! سؤیله كی پولو گؤردی اریم آزدی بو گوءن
وای وای منی بیچاره ائدیر ملاّ نصی چون ملّته بیر تازه غزل یازدی بو گوءن
من ده نئچه یوءز مین قویورام جیب لرینه آللاّه آمان آللاّه دئیه جك آزدی بو گوءن
|
|
سون یازیلار
