میرزه قدیر ناصری / اونودولماز موعللیم
یازار : گئرمي‌لي
+0 به یه ن
گئرمی‌لی‌لرین چوخو میرزه قدیر ناصری‌نی تانییرلار. درس اوخویون‌لارین چوخو
اونون اویرنجی‌سی اولوب‌لار؛ من‌ده بیر زامان‌لار اونون اویرنجی‌سی اولموشام.....
هر دم اوتوروب دوشوننده اونون یادینا دوشورم. دییه بیلرم ایندیه‌جن منه درس
وئرمیش موعللیم‌لرین اوستادلارین ایچینده ان گوج‌لولرین‌ده و یاددا قالان اینسان‌لاردان‌دیر.
تیپ‌لی، خوش گئییم‌لی، جیددی هردم ده یامان دییه‌ن بیر اویرتمن.
اوزونه بویوك حورمت‌له یاناشاردی. او بیری‌لرده، كونول‌لری ایسته‌مه‌سه‌ده،
اون‌لا حورمت‌له یاناشماغا مجبور ایدی‌لر. یادیمدادیر او اولان زامان موعللیم‌لر
دفتریندن جیققیر چیخمیردی. دانیشان‌دا یاواش دانیشمالی‌ایدی‌لار، او بیری‌لرین
دانیشیغین پوزمامالی‌ایدی‌لار. موعللم‌لرین موعللیمی ائله قودرت‌لی اینسان‌ایدی،
اینسانین ذهنینده اوزونو حك ائدیردی.
ناصری‌نین اونودولمازلیغی منیم اوچون بو موحكم‌لیینده دئییل‌دیر، اوندان اونم‌لی
اونون بویوك روحو، ایره‌لیلیشه اولان بویوك روحودور. هئچ واخت یادیمدان چیخمیر سون
ایل‌ده حاققیمیزدا اولان بویوك‌لویو. "پیش دانیشگاهی" اوخویان زامانی دئدی
گرك تئست كیلاس‌لاری اوچون آد یازدیراسیز. دانیشگاه‌دان، بیلیم‌یورددان چیخماق
ایسته‌ییرسیز آخشام اوستونوده درس اوخومالیسینیز. او زامان من دورد بئش نفر اوشاق‌لارلا
بیرلیك‌ده تئست كیلاس‌لاری اوچون آد یازدیردیق. آنجاق اوشاق‌لارین چوخو آد
یازدیرمادی‌لار....
ناصری بون‌لاری بیلن‌دن سونرا چوخ ناراحات اولدو. یادیمدان چیخمیر او آن‌لار.
هامی‌نین آدین تئست كیلاس‌لاری اوچون یازدیردی. موعللم‌لری مجبور ائتدی آخشام
اوستولر، پولسوز اوشاق‌لارا تئست / كنكور كیلاس‌لاری قویسون‌لار....
بعضی جومله‌لری وار همیشه ذئهنیمده یاشاییرلار. دئییردی گئدین درس اوخویون
كیتاب هانبالی اولمایین! سیز درس اوخومالیسینیز. سیز درس اوخویان‌دان سونرا منیم
قدریمی بیلرسینیز. درس اوخومایان اینسان میرزه قدیرین قدرین بیله بیلمز. بئساواد
آدام ساوادلی‌نین نه دئدییین آنلایا بیلمز...
یادیمدادیر فجر اونلویوندا (دهه فجرده) شهرین بوتون مسول‌لاری اوخولوموزن
نامازخاناسی‌نا ییغیشمیش‌دی‌لار بیزیم اوچون دانیشیردی‌لار. گوردویو ایش‌لردن دئدی‌لر
و.... سون‌دا سوزو ناصری‌ه وئردیلر. او دوروب دئدی قارداش بئبیله دانیش‌دیز آنجاق
بیر نفریز گلسین منی آپارسین گوروم سیز دیه‌ن بو گئرمی شهری هاردادیر؟ آسفالتی
یاخشی، گول‌لو بولبول‌لو گئرمی هاردادیر. سیزدیه‌ن گئرمی بیزیم یاشادیغیمیز گئرمی‌له
چوخ فرق‌لی‌دیر...
صاباحی‌سی گلدی كیلاسی‌میزا بیر ساعات مسول‌لاردان دانیشدا. هیرس‌لی واخت‌لاریندا
دئییردی قاچین بو خارابادان. من گئتمه‌دیم سیز گئدین.
هر دم حیرص‌لاناردی كیلاس‌دا. حیرص‌لانان زامان دانیشیق‌لاریندا چوخ دیققت‌لی
اولمازدی. گورردین یامان‌دا دیه‌ردی بعضن. سونرا عصب‌لری یئرینه قاییدان‌دان سونرا
جیددی حالتین ساخلاماق‌لا اوشاق‌لارین اوره‌ییندن چیخارداردی....
تعریف ائدیر اینقیلابین ایلك گون‌لریندن. دئییر كی اولكه‌نین بویوك باش‌لاری‌لا
بیر یئرده طلبه‌لیك ائدیرمیش. بیر گون شهید بهشتی گئرمی‌ه گلمیش‌میش آنجاق ناصری
جیناب‌لاری مدرسه درس وئرمك‌له مشقول‌اولدوغو اوچون ایستیقبالا گئتمیر. بهشتی آدام
گوندریر میرزه قدیر گلسین ایسته‌ییرم اونو گوروم. آنجاق او گئتمیر. یئنی‌دن آدام
گوندریر دئییر هر نه جور اولسا دئیین گلسین بورایا. دئییر گئتدیم یانینا، مملكت‌دن
دانیشیق آپاردیق. بهشتی منه دئدی نیه بو شهردن كوچوب تئهرانا گلمیرسن؟ گل اوردا
بیزه یاردیم‌چی اول. بوردا درس وئرمك اوچون كیفایت قدر موعللم واردیر. دئییر دی
دئدیم منیم بوردا قالیب بو یوخسول شهرین اوشاق‌لارینا درس وئرمه‌ییمین ثاوابی چوخ‌دور
یوخسا گلیب تئهران دا میز دالیندا اه‌یله‌شمه‌ییم. بونا دیه‌ندن سونرا بهشتی
ریضایت وئریر ناصری گئرمی‌ده قالیب اوشاق‌لارا درس دئمك‌له مشقول اولسون.....
بویوك آرزولاری وارایدی بیزیم اوچون. دئییردی ایسته‌ییرم نئچه ایل‌دن سونرا
دوكتورانیزی آلاندان سونرا یانیما گلیب، دیه‌سیز اللرینیز آغریماسین، سن بیزه
بویوك‌لوك یولون گوستردین و....
ندن‌سه همیشه یادیم‌دا اولسادا باش وورماغا ایمكان تاپا بیلمه‌میشم. ائله
بورادان بو یازی‌نی اوخوسادا-اوخوماسادا عزیز موعللیمیمه سالام دئییب اوندان
چكدیگی بویوك زحمت‌لر اوچون تشككور ائدیرم.
سون یازیلار
