گرمی نیوز

«من بیر اینسانام؟!!/ بونا امین دئییلم!/ من بیر جانلی­یام؟!!/ بونا امین دئییلم!/ من بیر داشام/ قارغالار یووا سالیب قولاغیمدا/ اووجومدا اؤلو گؤیرچین/ باشیمدا قورویوب زئیتون یارپاقلاری/ قانقاللار بیتیب آیاقلاریمین دیبیندن/ ترپنمه­یه گوجوم چاتمیر/ اوره­ییم داش دویونه دوشوب/ منی بو طیلیسمدن قورتاران اولاجاقمی؟!!/ بونا امین دئییلم!/ ایسته­سز/ داش گؤوده­­می جیزیب/ یادیگار اولاراق/ یازا بیلرسیز/ آدینیزیلا/ سوی آدینیزی/ اینجیمه­رم/ بونا امینم…»

(داشلار، ر. ج)

رامین جهانگیرزاده

بیر آز وطن دئدیلر، سونرا پایلارینی آلماغا چالیشدیلار. پای بؤلنلر، اتینی شیشه چكیب، یئییب قودوردولار. بیر ـ بیرلرینین جانلارینا دوشوب، جان دئییب، جان ائشیتدیكلری وطنین سومویونو اویناتدیلار. اویونبازلارین الینده قارغ اولدو وطن. سومویو ـ سومویوندن آیریلدی. چارتلادی قابیرغاسی. قارغالارین گؤزلریندن باخدیق اونلارا. قاغالار یئنه ده قاغالانیب قاغایی­لارین اوستونده اوتوروب قاغالاندیلار:

ـ باس باییرا بورا وطندیر.

وطن، وطن اولمادی، وطن بیر تن اولدو. بؤلدولر ایسته­دیكلری كیمی. پایلارینی آلدیلار زیرپی­لار. زیرهو دئییب زیرپی­لاندیلار. زیرپی­لانیب قاغالیق ائتدیلر. اونودولدو اینسان. داشا چئوریلدی. ترپنمه­یه گوجو چاتمادی. هم ایستیسی اولدو هم سویوغو. نه ایستی­سی ایستی اولدو نه سویوغو سویوق. ایستی سویوغا دوشدو، چارتلادی، اویولدو بو داش، دیله گلدی:

 ـ ترپنمه­یین، هر نه یئرینده­دیر. میخیزی چالا بیلرسیز آیاقدان باشا داشلی بدنیمه. بورا آذربایجان، دانیشیر موغان سسی! میغمیغالارینا هئچ بیر سؤز یوخ! سسیمی میغمیغالارا یوكله­میشم. سسلرین اوچوشوندان هوركوب گورولده­مه­یین. گامیشلیقلارین خیشیلتیسیندان قورخمایین! قولاغینیزی یوممایین، آرازین سسی قولاغینیزا دولاندا دیسكینمه­یین. آراز داها قییقاجی آخمیر. قانینیز قارالماسین. قارا بالیغین لئشینی ایتلر یئییب، قودوردولار. قانیمیزدا هوردولر. هؤرومچكلرین توی بایرامی باشلاندی. باشلارینی قاشیماغا واخت تاپمادیلار. ایت بانیندا میلچكلرینیز بانلایاندا، بامسی بئیركین قانلی كؤینه­یینی گتیردیلر. خان قازانین بئلی سپدی. دده­ قوپوزونو سیندیردی. آتدی آت دیرناقلی آداملارین اوستونه. توستو قوپدو آت دیرناقلیلاردان. قیزاریب، بوزاردیلار. بیر آز یوخ بلكه بیر آز چوخ هده قورخو گلدیلر:

ـ هئی دده­! اؤزوندن چیخما بئله. ایسته­سك آدینی سیله­ریك تاریخیمیزدن! ـ دئدیلر.

دده­ سؤزه باخمادی. دده­نی چیخارتدیلار سؤزلردن. ساققالی­نی ووردو دده­، توكونو قارا بویالادی. تاریخی یئنی­دن باشلادی. یئددی باشلی ایلانلار، باش قالدیردیلار. یئددی دؤنه دده­نی چالیب، زهرله­دیلر. تاریخ زهرلندی. زهرمارا دؤندو. دده­نی قورو دوشدو قورباغالارین آغزینا، قورباغالار گئجه گوندوز قورلدادیلار. قورباغالارین قورولتایی باشلاندی. كپنكلری سویقیریم ائتمه­یه قرار چیخارتدیلار…

http://pitraq.blogfa.com/post-264.aspx