گئرمي نيوز فرق‌لي بير وئبلاگ يئني نسليميز اوچون *** گرمي نيوز وبلاگي متفاوت براي نسل جديد
گئرمی‌لی بیر شاعیری تانییاق (ابراهیم زاهید خزایری) / علی محمد خلفی زنگبر

گئرمی‌لی بیر شاعیری تانییاق (ابراهیم زاهید خزایری) / علی محمد خلفی زنگبر

یازار : گئرمي‌لي

+0 به یه ن
گرمی نیوز:

چوخ‌لاریمیز ابراهیم زاهیدنن تانیشیق. شاید بعضی‌لریمیزده اونو هله ده تانیمامیشیق. ده‌یه‌رلی میل موغان وئبلاگی بو بویوك شاعیریمیزی تانیتدیرماغا جهد ائدیب. گرمی نیوز میل موغان‌ا ال‌لرینیز وار اولسون دئییب بو گوزل یازینی اوخوجولارینا سونور. یازی‌یا گیرمه‌دن اونجه ابراهیم زاهیددن یادیمدان قالان بیر شعری‌ده یازماق ایسته‌ییرم (اومود ائدیرم شعر دوز یادیم‌دا قالیب‌دیر):

ابراهیم زاهیدم بودور دئمه‌ییم / اومودله دویونور داییم اوره‌ییم/خالقین خوشبختلیگی آرزوم دیله‌ییرم
سمایه اوجالان الیم وار منیم / دوعایا اوجالان الیم وار منیم

 ابراهیم زاهید خزایری 1347-جی گونش ایلینده موغانین گئرمی شهری‌نین تولون كندینده آنادان اولموش و ابتدایی- اورتا تحصیلاتینی دا اؤز دوغما كندینده بیتیرمیشدیر.

او ائله یئنی‌یئتمه چاغ‌لاریندان شعرلر یازماغا و موسیقی ایله ماراقلانماغا باشلامیشدیر.

موللا محمد فیضولی، سئیید عظیم شیروانی و علی آغا واحید كیمی كلاسیك‌لرین و یارادیجیلیغی‌نین اوخوماسی ایله، شعر دونیاسینا قدم قویان گنج شاعیر «ابراهیم زاهید» بیلیم یورد تحصیلی آلیب، دؤولت ایشینده چالیشیب و ایران-عراق ساواشیندا 6 ایله یاخین ایشتیراك ائتمیشدیر.


ایندی ابراهیم زاهید ایران‌دا و آذربایجان‌دا، تانینمیش و سئویلیب-سئچیلمیش شاعیر و موسیقی‌چی‌دیر. اونون یارادیجیلیغیندا بوتون قالب‌لر‌له یاناشی، «غزل» داها اوستونلوك داشیییر. مضمون باخیمیندان دا سئوگی، محبت و اَن اساس وطن‌پرورلیك موضوعسو داها آرتیق گؤزه چارپیر.

ابراهیم زاهیدین «آذربایجان دانیشیر» آدلی بیرینجی كیتابی 2005-نجی ایلده بؤیوك سایدا باكی شهرینده چاپ اولونموش و یوكسك ماراق‌لا قارشیلانمیشدیر.

بو كیتابین تقدیمات مراسیمینده آذربایجانین اَن آدلیم خاننده‌لری حاجی آغاخان عبدالله یئو، تئیمور مصطفی یئو، جابیر عبدالله یئو، فیروز سخاوت، بال اوغلان اشرف اوو، صفر مممد اوو و بیر چوخ صنعت‌كارلار و موغام اوستالاری اولموشدولار.

2006 اینجی ایلده ده «غزل‌لر» آدلی كیتابی باكیدا چاپ اولموشدور.

ابراهیمین عرصه‌یه گلمه‌گینده فیلولوقیا علم‌لری دوكتورو، پروفسور، شاعیر ووقار احمد جاناب‌لاری‌نین چوخ امه‌گی اولموشدور. آنجاق اونون یاردیمی ایله ابراهیمین كیتابی ایشیق اوزو گؤروب و  هم ده شعر نمونه‌لری آذربایجان درگی‌لرینده آردیجیل اولاراق چاپ اولونور و موسیقی نمونه لری آذربایجان تئلئویزیا و رادیو كانال‌لاریندان تئز-تئز سسله‌نیر.

بیزده وطنیمزین آدلیم شاعیری و موسیقی‌چی‌سینه اولو تانیردان جان ساغلیغی، اوزون عؤمور و حیاتدا یئنی-یئنی اوغورلار دیله‌ییریك.

ابراهیم زاهید دن شعر نمونه‌سی:

  

ایندی بیر باشقا زاماندیر بوتون اینسان دانیشیر

وارلیغین جار ائله‌ییر عالم ایمكان دانیشیر

من نییه سوسمالییام حاققیمی بیگانه یئیه

من واریمنان دئمه‌سم چوخ‌لاری یوخدان دانیشیر

من او خالقام كی، منیم یوردوم آلولار یئری‌دیر

آراسان تورپاغیمی اوددان آلودان دانیشیر

من كوراوغلو یئتیریب ظالیمی محو ائیله‌میشم

یئری گلسه قیلیجیم دوشمانا قان-قان دانیشیر

قهرامان بابكیمین شهرتی آفاقی توتوب

اوخوسان تاریخیمین هر واراغی شان دانیشیر

نبی‌مین آدی گلنده گئنه بی‌لر اوشه‌نیر

او قوچاغدان هله ده خان ایله سلطان دانیشیر

من او خالقام كی فوضولی منیم اولادئم اولوب

بونو تك من دئمیرم گور نئچه دیوان دانیشیر

من نیظامی كیمی اعجاز ائله‌ین میللتی‌ام

خور باخان‌لار هله بو حق سوزه بهتان دانیشیر

سیغمایان هر ایكی دونیایه نسیمی ده منم

گؤر نه گؤزدن باخیر او خیلقته هاردان دانیشیر

من او یوردام كی منیم واحیدیمین یوخدو تایی

چوخ درین سؤزلری او ساده وو آسان دانیشیر

من او خالقام كی جهان اهلی سئویر موسیقیمی

من‌ده شوكت‌له سارا جاببار ایله خان دانیشیر

دف ایله تار و كامان ساز ایله سؤزله بالابان

ناغارا، زورنا، توتك سئومه‌لی قارمان دانیشیر

بو نیشان‌لار كی دئدین وصفینه "زاهید" بیلدیك

بو شیرین دیل‌له بیزه آذربایجان دانیشیر

http://www.milmugan.blogfa.com/post-15.aspx



سون یازیلار

گئرمي نيوز فرق‌لي بير وئبلاگ يئني نسليميز اوچون *** گرمي نيوز وبلاگي متفاوت براي نسل جديد

گرمي نيوز، فرق‌لي باخيش