گرمی نیوز

گرمی نیوز:

تورّوم نرخی، گوءندن گوءنه چوخالیر، و بانك مركزی دئدیگینه گؤره كئچن آی (خورداد ۹۱) ۲۲.۴٪ اولموشدور.   بو دا خبرین لینكی:  خبرگزاری جمهوری اسلامی ایران

یادیما گلیر كی، احمدی نژاد دئییردی كی، یارانه لرین هدفمند اولماغی‏نی اجرا ائتمه سك، نئچه ایلین عرضینده اؤلكه میز بؤحرانا كئچه جك.

ملاّ نصرالدّین دئییردی: "من بئله بیلیرم جومله نین قالانی‏نی دئمه ییبدیر: و اگر بئله اجرا اولونسا، اوندان تئز بوحرانا كئچمه لی ییك."

البته بونو دا دئمه لی ییك كی بیز ملّته، قیمت لر اصلا اهمیتی یوخدور، اهمیته مالك اولان مساله بودور كی، خلیجین آدی خلیج فارس اولسون، یوخسا خلیج عرب. بیز آج قالماغا دؤزریك، اؤلوم ده اولسا اؤزوموزو اؤلومه وئرریك، آمّا سیز آللاه قویمایین بیری بو خلیجه خلیج عرب دئسین.

دولاشیق دوءشدو ایشین گوءنده؛ آ بیچاره یازیق

اولاجاقدیر هله بوندان دا گوءنون قاره یازیق

 

تویوغون قیمتی بوندان دا گئدر اوءسته لیگه

بوش قالان سوفره‏نه هیچ اولمایاجاق چاره یازیق

 

نئینه ییرسن یئمگی، بیر پارا سنگك ده گؤرر

هاردا گؤردون كی اتی، دولمانی آختاره یازیق

 

سن اوچون خلق اولونان تامسونو، آلمانی، اتی

باهالیق واختی اوچون تپدیلر آنباره، یازیق

 

بلكه ده جمعیتی سایمالی واختیندا سنی

گؤرمه ییبلر چكه لر اسمیوی آماره یازیق

 

بیزیم البته بؤیوك موشكولوموز واردی یقین

كی خلیجین آدی فارس اولسا گلر كاره یازیق

 

سس گلیر گؤیدن، آی آللاّه شوكور حكمت لریوه

بیلمیرم خلق اولونوبدور نیه آواره یازیق

 

بیر گئجه شام یئمگه، پول تاپا بیلمزسه دوروب

بؤیرگین تئز گؤتوروب ساتدی دا سمساره یازیق

 

دور گئدك ملاّ نصی بیز كی بیر ایش گؤرمه میشیك

قولاغیمدان چكه جك، هر گئجه  بیر پاره یازیق

http://nasraddin.blogfa.com/post/27