گرمی نیوز

گرمی نیوز:

بیرینجی پرده:

او تك و تنها، یاردیم‌سیز و اومودسوز یاشاییر. هر شئی قارانلیق‌لیغا دوغرو گئدیر. هر یئرده ظولم وار، تاریخ بویونجا ظولم و او بو ظولم‌لر قاباغیندا هئچ بیر گوجه مالیك دئییل. اونو اونا آتاسی اویره‌تمیش‌دیر، آناسی، فامیل‌لری و یاشادیغی توپلومو....

اونون دوشونجه‌لری بونلاری قبول ائتمیردی آنجاق بو ظولم قاباغیندا دورماق اونون همیشه‌لیك آرزوسو ایدی. او بیلیردی كی بیر اینسان ظولم قاباغیندا دورمالی‌دیر. آنجاق اونون ذهنینده یارانان دوشونجه‌لر ضعیف‌لیك، عورضه‌سیزلیك و بوشلوق‌لا دولوایدی....

او بیلیردی كی بو ظولم‌لره قارشی هئچ بیر گوجو یوخدور. ناخارتا چالیشسادا نهایتده اوغورسوزلوق‌لا اوزبه‌اوز اولاجاق و هر شئیی اوتوزاجاق، چونكو ظولمون گوجو سونسوزدور و اینسان‌لار بیربیرلرین و اوبیری‌لرین ظولم اونونده تك قویورلار....

ایكینجی پرده:

او تك باشینا بو ظولم‌لر اونونده دورماق ایسته‌میر. او بیلیر كی الیندن هئچ ایش گلمیر. باشلاییر یالوارماغا. آنجاق آتا-آناسی و توپلوم اونا اویرتمیشدیلر كی ظالیم قاباغیندا یالوارماق اولماز! او ظولم قاباغیندا دورماغا گوجو یوخدور و عینی حالدا ظولم صاحیبینه یالوارا بیلمیر....

او یالوارماغا و بو حدده ضعیف‌لیگینی بیرینه دانیشماق ایسته‌ییر و بو ظولم‌لر اونونده اوزوندن داها گوجلوسون آختاریر. او نهایت آختاردیغین تاپیر. بو دونیادا اولمایان بیر وارلیق....

او بیلیر كی اونون یاردیم‌ایله بوتون ظولم‌لره سون وئره بیله‌جك و نهایت ظولمو و عدالت‌سیزلیگی آرادان قالدیراجاق‌دیر. اونا گوره آغلار گوزله اونون یانینا گئدیر و یالواریر. دئییر كی من بو ظولم‌لر اونونده چوخ ضعیفم سن منه یاردیمچی اول بودا وار یوخ پولوم و دارایاتیم. هامیسی سنین اولسون آنجاق سنین سونسوز گوجون منه یاردیمچی اولسون......

اوچونجو پرده:

و من بوتون ظولم‌لر اونونده دورماق ایسته‌ییرم. من یئر اوزونون خلیفه‌سی‌یه‌م. من اوزوم بوتون گوجوم‌ایله بونلارا سون وئره‌جه‌یه‌م. و من یارادیرام یئنی یاشاییشی، گاندی كیمی، نلسون ماندلا كیمی، لوتر كینگ كیمی و ....

و من گئجه گوندوز چالیشیرام. یازیرام، یازیلاریمی یاییرام، بوتون اینسان‌لارلا ایلگی قورورام و قارانلیق‌لاری سیندیرماغا چالیشیرام....

دوردونجو پرده:

و من نهایت عومرومو دوستاقلاردا یاشاییرام درین بیر فیشار و ظولم آلتیندا یاشاییرام و میلت اوز كئفلرینده هله ده پوللارینی اولمایان بیر گوجه سونورلار و اونلار منی تك قویوب‌لار.

من دونیانین ان تك قالمیش اینسانیام و هیچ كیم منی سئومیر. هئچ كیم منیم نه دئدیگی آنلامیر و هامی اوز شخصی منفعت‌لرینه گوره منی تك قویورلار. اوریانا فالاچی‌نین "بیر كیشی" رومانین اوخوسانیز منی داها آیدین آنلایا بیلرسیز.

ایچلرینده انقلاب و دئوریم باش وئرمه‌یه‌ن اینسان‌لار. اونلار توپلومون بئجردیگی عاوام و قویون كیمی یاشایان اینسان‌لاری‌دیرلار. و اونلار قیام ائتمك‌دن چكینیرلر و من اونلارا نیفرت ائدیرم. نه اوچون ایشیق‌لیغا دوغرو آیاغا قالخمیرلار....

بئشیجی پرده:

سیزیف داشینین دالیجان داغ‌دان آشاغی‌یا یئلله‌نیر و یئنی‌دن داشین بوتون وارلیغی‌لا یوخاری‌یا طرف ایته‌له‌ییر. و بیلیر كی بو سونسوز بیر ظولم‌دور. توكنمز بیر مجازات. چونكو او حیاتی سئویردی و بوتون تانری‌لار اونونده عصیان بایراغین قالدیرمیشدی و بو یاشاییشی سئومه‌یین جزاسی "پوچلوق" ایچینده یاشاماقدیر. آنجاق اوز ایچینده قیام ائدن و توركجه قاورامین بیلمه‌دیگیم "هوشیار" اولان اینسان اوچون "پوچلوق" "سئوینج" له دولودور. او بونلارین هامیسین اویاق و دیری‌باش بیر اینسان كیمی آنلاییر.

دونیانین ان كدرلی یاشاییشی باشا دوشمه‌یه‌ن و یوخودا عومرلرین سونا ووران اینسان‌لار اوچون دور. اونلار ایسته‌میر آییلالار. چونكو آییلماق‌لاری بوتون وارلیق‌لارین الدن‌وئرمك‌له برابردیر. و اونلار بوش بیر اینسانا چئوریلیرلر و بوشلوغو دولدورماغا هئچ بیر آراج‌لاری / ابزارلاری یوخدور. و بو بوشلوق اونلاری دیلدن سالا بیلر.

آلتینجی پرده:

و یاشاییشی سئچن اینسان نهایت اوزون قارانلیق‌لار ایچینده تاپاجاق‌دیر. او گولمه‌یی و شادلیق‌لاری اونودوب‌سا اوندا اوزوده بیر قارانلیغا چئوریله‌جك‌دیر. فالاچی‌نین رومانین‌دا اولان كیمی او بیر اولدوزدور كی اوزون كیچیلدیر، اوخارتا كیچیلیر و نورسوز اولور كی سیاه‌چاله‌یه گیرمك اوچون هئچ بیر چتین‌لیك چكمیر. او بیر لیمو اندازه‌سینده اولور و یا بیر سوغان اندازه‌سینده و نهایت اولوم‌ایله سونسوز بیر قارانلیغا جومور....

و شایدده اوخارتا گئنیش‌لشیر كی ایستی‌سی بوتون یاشاییشی اریدیر.......