اویونلار / علی محمد خلفی زنگیر
یازار : گئرمي‌لي
+0 به یه ن
دوزون ایسته‌سه‌نیز، بیر وبلاگچی اوچون هئچ نه خبرسیزلیك كیمی آغیر اولمور!! ایكی عابیرلی خبر یوخدور یازاق یادا تحلیل ائدك. طنز ذهنیمیزده یاتیب. محفلكده كی بیلینمیر هانسی محفلده یوخایا گئدیب! اوغلان قیشدا ائله بیل دویغولارینیز بوز باغلاییب! گلین بو سویوق هاوانی اوز ایستی نفسلرینیزله ایسته‌له‌دین.....
ملانصرالدین‌ده ائله‌بیل كی یاز ایسین آلیب، خبر وئریب كی یازاجاق چوخ یاخین بیر زاماندا.
بو دورومدا تكجه میل موغان وبلاگی همیشه‌كی كیمین باهاردی و بیز ائله‌ده اونا باش چكه بیلمیریك. لاییقینجه توجه ائده بیلمه‌سك‌ده اوز صمیمی تشكورلریمیز خلفی بَی‌دن اسیرگه‌میریك....
آل قره‌قوشوم
اویونچولار ایكی بؤلومه بؤلونورلر. پوشكو اودوزان اویونچولار اللرینی دیزلرینه قویا‌راق اّییلیب بیر-ایكی آددیم آرا ایله دؤوره دایانیرلار. او بیری اویونچولار اونلارین بئل‌لرینده اوتورا‌راق پاپاغی بیر-بیرلرینه آتا‌راق دئییرلر:
“آل قره‌قوشوم دوشمه یئره قان اولار”
پاپاق یئره دوشمه‌یینجه اویون بئله داوام ائدیر. پاپاق یئره دوشن كیمی اویونچولارین یئرلری دییشیلیر. بو اویوندا اولان حركتلره گؤره اویونچولار فیزیكی باخیمدان گلیشیرلر.
اَل‌بوْوشی/ بئش‌داش
بو اویون ایكی نفردن باشلایا‌راق اوچ-دؤرد نفرین آراسیندا اوتدوق‌یئری و ائوده، حیَط-باجادا اوینانیلیر.
بئش دنه بارماق بوغونو بویدا داش سئچیلیر. اویون باشدا اوتوران اویونچودان باشلانیر. بو اویون نئچه بؤلوم اولور:
بیرلر: اویونچو بئش داشی گؤیه آتیر داشلار یئره سپه‌لنیر، اونلارین بیرینی گؤتورور گؤیه آتیر او داش یئره گلینجه، یئرده اولان داشین بیرینی گؤتورور و تئز گؤیدن گلن داشی گؤیده توتور.یئرده قالان داشلارین هامی‌سین بو شكیلده گؤتورور اؤنجه‌كی دانیشیقلا باغلی یئردن گؤتورولن داشلار او بیری اله وئریلیر یوخسا او الده قالما‌لیدیر. داشلارین هامیسی گؤتورولور و بیرلر قوتاریر.
ایكیلر: اویونچو بئش داشی گؤیه آتیر داشلار یئره سپه‌لنیر، اونلارین بیرینی گؤتورور گؤیه آتیر او داش یئره گلینجه، یئرده اولان داشلارین ایكی‌سینی سوپوروب گؤتورور و تئز گؤیدن گلن داشی گؤیده توتور. قالان ایكی داشی دا بو شكیلده گؤتورور. ایكیلر قوتاریر.
اوچلر: اویونچو بئش داشی گؤیه آتیر داشلار یئره سپه‌لنیر، اونلارین بیرینی گؤتورور گؤیه آتیر او داش یئره گلینجه، یئرده اولان داشلارین اوچونو سوپوروب گؤتورور و تئز گؤیدن گلن داشی گؤیده توتور. قالان بیر داشی دا بو شكیلده گؤتورور. اوچلر قوتاریر.
دؤردلر (آلما‌لار): اویونچو بئش داشین بیرینی باش بارماغی ایله ایشارت بارماغی‌نین آراسیندا، قالان دؤرد داشی الی‌نین ایچینده ساخلاییر. بیر داشی گؤیه آتیر او داش یئره گلینجه، دؤرد داشی بیرلیكده یئره قویور و تئز گؤیدن گلن داشی گؤیده توتور. او داشی بیر ده گؤیه آتا‌راق یئرده اولان دؤرد داشی بیرلیكده سوپوروب گؤتورور و تئز گؤیدن گلن داشی توتور. آلما‌لار قوتاریر.
اویونون هر یئرینده یانیلسا سیرا او بیری اویونچویا كئچیر. یئنه سیراسی گلینجه قالدیغی یئردن داوام ائدیر.
دییشدیرمه‌لر(دییش- دویوش): اویونچو داشلاری یئره سپیر. داشین بیرینی گؤتورور گؤیه آتیر او داش یئره گلینجه یئرده اولان داشلارین بیرین گؤتورور و گؤیده‌كی داشی یئره گلنده توتور. الی‌نین ایچینده اولان داشی جولو بارماغی ایله ساخلایا‌راق، توتدوغو داشی گؤیه آتیر، او داش یئره گلینجه، یئرده اولان داشین بیرینی گؤتورنده اَلینده اولان داشی جولو بارماغی‌نین آرخاسیندان یئره سالیر. دئمه‌لی اَلینده‌كی داشی بئله‌جه دییشدیریر و تئز گؤیدن گلن داشی توتور.
داشلارین هامی‌سینی بئله دییشدیردیكدن سونرا، یئرده اولان داشلاری اویوندان اؤنجه‌كی دانیشیقلا باغلی ایكی شكیلده ییغماق اولور: الده اولان داشی گؤیه آتا‌راق یئرده‌كی داشلاری بیردن سوپوروب گؤتورمك، یاخود بیرلر كیمی الده اولان داشی یئرده اولان هر بیر داش اوچون بیر یول گؤیه آتیب اونلاری بیر-بیر، بیر اله گؤتورمك. داشلارین بوتونو بیر اله ییغیشدیقدان سونرا دییشدیرمه قوتاریر.
ایتلر: اویونچو داشلاری یئره سپیر، اونلارین بیرینی گؤتورور. الی‌نین بیری‌نین ایشارت بارماغین اورتا بارماغی‌نین اوستونه آشیریر، او اَلینده، باش بارماغی ایله اورتا بارماغین داشلارین قاباغیندا یئره سؤیكه‌یه‌رك بیر گیلفه دوزلدیر. بو چاغ قارشی اویونچو اؤزونه یئرده اولان داشلاردان بیرینی ایت سئچیر. اویونو آپاران اویونچو اَلینده اولان داشی گؤیه آتا‌راق بیر یا نئچه (اؤنجه‌كی دانیشیقلا باغلی) حركتله یئرده اولان داشلاری گیلفه‌دن كئچیرمه‌لی اولور. داشلار گیلفه‌دن كئچیریلن چاغ، نه داشلار، نه ده كی، اویونچونون اَلی ایته دیمه‌مه‌لیدیر.
سوندا بو شكیلده ایتی ده گیلفه‌دن كئچیریر و اویون بیتیر. اویون دئییلن شكیلده گئتمه‌سه و یاخود اویونو آپاران اویونچودان بیر یانلیشلیق باش وئرسه سیرا او بیری اویونچویا كئچیر، و سیرا آیریدان اونا قاییدان چاغ اویونو قالدیغی یئریندن داوام ائتدیرمه‌لی اولور.
بو آلتی مرحله‌یه بیر خوم دئییلیر. دانیشیغا گؤره اویون بیر نئچه خوم اولور. اویونو اودان اویونچو داشلارا آد قویور (جیرماقلاما، چیمدیك، بالتا، كوپه‌دن بالچیخارتما، قوش گؤسترمه) و اونلاری داغینیق شكیلده اودوزان اویونچونون بیر یا ایكی (اؤنجه كی، دانیشیغا باغلی) الی‌نین اوستونه ییغیر. اویونچو داشلاری گؤیه آتیر و اونلارین هامی‌سینی آتدیغی اَلی ایله توتماغا چالیشیر. داشلارین هامی‌سینی توتسا اونو اودوزدوغونا گؤره هئچ بیر جزا گؤزله‌میر. یئره دوشن هر بیر داشین آدی ایله باغلی اودوزان اویونچو جزا چكمه‌لی اولور.
قوش گؤسترمه داشینی اودوزان اویونچونون ایكی بارماغی‌نین آراسینا قویوب سیخاندا او گرك اودان اویونچویا بیر قوش گؤسترسین.
كوپه‌دن بال چیخارما داشینی، اودان اویونچو اللری‌نین آلتینا قویور و بارماقلارینی جایناق شكیلده بیر آز گوده ساخلاییر. اودوزان اویونچو او داشی اوردان چیخارماغا چالیشیر و كوپ‌چو ده اونون اَلینی جایناقلاری ایله جیزیر. داش اوردان چیخان كیمی بو جزا بیتیر.
جیرماقلاما داشینی اودان اویونچو گؤیه آتیر دئییر: یاغلارام. داشی توتور بیر ده آتیر دئییر: بوغلارام. داشی توتور و بیر آتیر دئییر: آخیریندا جیرماقلارام. داش دوشونجه بئله داوام ائدیر و اودوزانین اَلینی جیرماقلاییر.
اودوزان اویونچو اَلینی یئره قویور و اودان اویونچو بالتالاما و یا ... داشینی گؤیه آتا‌راق داشین آدی ایله باغلی بالتالاییر و یا .... داش یئره گلنده توتور. داش یئره دوشمه‌یینجه داوام ائدیر.
بو اویونو چوخلو قیزلار اویناییرلار. بو اویون اَیلنجه‌‌دن باشقا قیزلارین ال حركتینی گوجلندیریر. بیر قیز هانا توخویاندا ایلمه‌نی چوخ تئز-تئز ووراندا “الله ساخلاسین فیلان كسین قیزی‌نین اَلینی گؤرمه‌لی دئییل” دئییردیلر. عومومیّتله بو اویون قیز-گلین اویونو كیمی تانینیر.
قایناق:
سون یازیلار
