گرمی نیوز

دیل اینسانلار آراسیندا آنلاشماغی فراهم ائدن طبیعی بیر وسیله‌؛ اؤز قانونلاری ایچه‌ری‌سینده یاشایان و گلیشن جانلی بیر وارلیق؛ میلّتی بیرلشدیرن، قورویان و اونون اورتاق مالی اولان ایجتیماعی بیر مؤسیسه؛ مین ایللر بویونجا پیشرفت ائده‌رك مئیدانا گلمیش بیر ایجتیماعی قوروم؛ سسلردن هؤرولموش بیر آغ؛ كؤكو بیلینمه‌ین زامانلاردا آتیلمیش بیر گیزلی آندلاشما‌لار سیستمی‌دیر.

دیل، باشقا اینسانلارلا بوتون ایرتیباطلاریمیزدا بیزه آراچیلیق ائدن، ایجتیماعی رابیطه‌لریمیزی نیظاما سالان بیر واسیطه اولاراق حیاتیمیزین هر صفحه‌سینده مؤوجوددور. ائوده، مدرسه‌ده، چؤلده، بازاردا، ایش یئرینده و هر یئرده اونونلا باهم یاشاییریق. اینسان دانیشدیغی دیلی دوغولدوغو گوندن حاضیر گؤرور. آنجاق دیل دوغوشدان بیلینمز. ایلك آیلاردا آغلاما‌لار، تقلید، بیرسیرا حركتلر آنلاشما ساغلاماغا چالیشیر. اوشاق ایچینده یاشادیغی ایجتماعنین دیلینی، آنادیلینی اوزون بیر شاگیردلیك دؤوره‌سی مودّتینده اؤیرنیر. داها سونرا قولاغینا گلن سسلرین بللی مفهوملارا، حركتلره، وارلیقلارا قارشیلیق (مقابل) اولدوغونو آنلاماغا باشلاییر.

دیل اینسان منلیگی‌‌نین آیریلماز بیر پارچاسی‌دیر. اینسان ذكاسی‌نین، اینساندا مرزی تعیین اولونمایان دویغو و دوشونجه قابلیّتی‌نین نتیجه‌لری اؤز منلیگیندن چؤله فقط دیل‌ ایله اینتیقال تاپابیلر. بو باخیمدان دیل ایله دوشونجه ایچ -ایچه گیرمیش وضعیّتده‌دیر. اینسان دیل ایله دوشونور. دیلین پیشرفتی دوشونجه‌یه، دوشونجه‌نین پیشرفتی ده دیله باغلیدیر. موختلیف مدنیّتلرین مئیدانا گتیریلمه‌سینی فراهم ائدن دوشونجه، پیشرفتینی دیله بورجلودور.

دیل هر شئی‌دن قاباق ایجتیماعی و میلّی بیر وارلیقدیر. فردلرین اوستونده، بیر میلّتی ایلگیلندیریر. بوتون بیر میلّتین دویغو و دوشونجه خزینه‌سینی تشكیل وئریر. بیر میلّتی آیاق اوسته ساخلایان، فردلری بیربیرینه باغلایان، ایجتیماعی حیاتی نیظاما سالان و داوام ائتدیرن، میلّی شعورو بسله‌ین بیر عونصور اولاراق دیلین اوینادیغی رول چوخ بؤیوكدور. میلّی شعورون ان قووّتلی قایناغی دیلدیر.

بللی سس دسته‌لری‌نین اینسانلار آراسیندا دانیشیقلی بیر ارزش قازاناراق بیر مفهوما مقابل اولما‌لاری دیلین تشكیل تاپماسیندا اساس ساییلابیلر. بونون كیمی اونلارین موختلیف ایستیفاده‌لری ده اورتاق دیَرلر باغلایاراق دیلین قایدالارینی مئیدانا گتیرمیش اولما‌لی‌دیرلار. بونلار چوخالیب گئنیشلنمیش و آز چوخ دیقّتله قوروناراق نسیلدن نسیله اینتیقال تاپمیشدیر. سس قانونلارینا اویوب زامانلا دییشمه‌لره اوغرامیش اولما‌لاری دا طبیعی‌دیر.

دیل دوشونمه‌نین ده بیر واسیطه‌سی اولموشدور. آنا دیلیمیزدن جومله‌لر قوراراق دوشونوروك. بونلاری دیله گئتیردیییمیزده آدینا دانیشما دئییریك. دیل اولماسا دوشونجه و دویغو دا گلیشمزدی، اینسان ایجتماع‌سی پیشرفت ائدیب، بیر مدنیّت دوزلده‌بیلمزدی. گئنه بشره بخش اولونان دین حیاتی ایله صنعت حیاتی دا دیل كؤكو اوستونده قورولموشدورلار.

دیل دانیشما وسیله‌سی‌نین چیخاردیغی چوخ موختلیف سسلرین سون درجه‌ده قاریشیق بیر بیرلشیمیندن مئیدانا گلیر. آنجاق قولاغیمیز دا بونلاری بوتون اینجه‌لیكلری ایله آییرابیله‌جك قابلیّت‌ده‌دیر. بو سببله بیز اونلاری تحلیل ائتمكده چتینلیك چكمیریك. دانیشما اورگانلاری‌نین موعیّن بیر دوروم آلاراق بیر آن ایچینده چیخاردیقلاری ساده سسه بیر سسلیك، یاخود ساده‌جه سس دئییریك: آ، او، ب، ت كیمی. بیر نفس حمله‌سی ایچینده چیخان بیرنئچه سسین جمعینه ده هئجا آدینی وئریریك: "بو، قا-پی، پئن-جه-ره" كیمی.

بیر دیلده بیر آنلامی اولان تك ویا چوخ هئجا‌لی سس دسته‌لرینه كلمه دئییریك:: "قوش، گؤرمك، اومود‌سوز" كیمی. بیر دیلین بوتون كلمه‌لری او دیلین كلمه داغارجیغینی مئیدانا گتیریر. كلمه‌لرین بیر دوشونجه‌نی بیر بوتون اولاراق آنلادان نیظاملی جمعینه جومله آدینی وئریریك: "آیدین مدرسه‌یه گیتمَلی‌دیر." بیر مقصدی آنلاتماق اوچون بیر سیرا جومله‌لر ایستیفاده اولونور. بونا دا سؤز دئییریك. سؤزلرله آنلاشماق دانیشماقلا اولور.

اینسانلار سؤزلرینی اوزاقداكی‌لره چاتدیرماق، یا دا اوزون زامان ساخلاماق احتیاجی ایله اونلاری داها دایانیقلی بیر ایشارت سیستمینه چئویرمگی دوشونموشلر، یازینی ایجاد ائتمیشدیرلر. اسكی اینسانلار حاقّیندا بیلگیلریمیزی قویدوقلاری یازیلی سندلردن آلیریق. میلّتلرین یازیدان قاباقكی یاشاییشلاری حاقّیندا لاپ آز شئیی اؤیرنه‌بیلدیییمیز اوچون تاریخ یازییلا باشلاییر.

دیل بودور. بئله‌ده اولمالی‌دیر. چونكو آلله‌ین هر بیر آیتی اینسانی بئله یوكسلدیر. دیل اولماسایدی بلكه ده اینسان اشرف مخلوقات ....

http://www.milmugan.blogfa.com/post-51.aspx