گرمی نیوز

گرمی نیوز:

نهایت كی ملا عمی یولا دوشدو. ملانصرالدین "آنا دیلی" گونو موناسیبت ایله یئنی یازی یازیبدیر. یازی هامیمیزین اورَگینده قالان بویوك بیر یارادان دانیشیر و چوخ اؤنملی بیر اؤنر قاباغا قویور. دولت دیلمیزه اؤنم وئرمیرسه، گلین اؤزوموز اؤز آنادیلیمیزه اؤنم وئره‌گین، گلین هامیمیز ال-اله وئریب آنادیلیمزی دیری ساخلایاغین....

آنا دیلی حاقّیندا چوخ سؤزلر دئییلیب و یازیلیبدیر. آمّا هئچ بیریسی بیزیم آنا دیلین دردینه چاره قیلمیر. بیلمیرم درد هارداندیر، آمّا بو دردین آغریسی آنا دیلیمیزین سوموك لرینه كئچیبدیر. ائله كی، تزه اوشاقلار بو دیلین چوخ سؤزلرینی باشا دوشمورلر و یئرینه فارس دیلینده كی سؤزلری ایشلدیرلر. دووشان یئرینه خرگوش دئمك، یوخسا باغا یئرینه لاك پشت دئمك ائله ده گؤزدن اوزاق قالان بیر سؤز دئییل بیزیم شهریمیزده. هله بیزیم شهریمیزده فارس دیلی چوخ تأثیر قویماییبدیر، وای باشقا شهرلرین حالینا.

وبلاگ لاردا، نشریه لرده مسئوللاردان چوخ گلئیلنیب لر كی، آنا دیلیمیزه باخمیرسینیز. آما بیر دفعه ده هئچ اولماسا اؤزوموزدن ایسته یك كی مسئوللارا گؤز باغلامایاق، اؤزوموز چالیشاق، اؤزوموز ایشله یك. بلكه آللاّه ایسته سه ایشیمیزین نتیجه سینی گؤرك.

بونا گؤره تكجه لازمدیر، آرتیق اورك یاندیراق، آرتیق اوخویاق و توركجه نی توركجه كیمی دانیشاق. فارسجا دیلی بیزه مؤحترم اولسا دا، توركجه دیلی بیزه عزیزدیر، موقدّسدیر و اونو قوروماق بیزه بورجدور.

بو دیل بیزیم وارلیغیمیزدیر. آما درد اودور كی انسان اؤز وارلیغیندان اوتانا. اؤزونو ایتیره. حال بو كی بیزیم دیلیمیزین شیرینلیگی آز دیل لرده اولا بیلر.

درد او دور كی، شیرین سؤزلریمیزی اؤزگه دیلده دئیك، سؤیوش لریمیزی آنا دیلیمیزده.

درد اودور كی، فارس دیلینین حافظیندن، بو گوءنكو ایتگین شاعرلرینی تانیاق، آمّا اؤز دیلیمیزده اوچ شاعرین آدینی دئیه بیلمه یك. فضولی نین بیر بئیت شعرینی اوخومایاق. صابرین شیرین ساتیرالارینی عؤمور بویو ائشیتمه یك.

درد او دور كی، هله اؤز دیلیمیزی یازیب اوخویا بیلمه دن، فارس دیلینده بؤیوك شاعر اولماق هوسینده اولاق.

بو دیل تكجه سؤزوموزو یئتیرمك اوچون وسیله دئییل. بو دیل كئچمیش لریمیزدن یئتیشن خزینه دیر. و گله جك لریمیزه امانتیمیزدیر.

وطن اوغلو، چوبان قارا

یای سورونو گؤی داغ لارا

نور ساچیر آی یاماج لارا

نور ساچیر آی یاماج لارا

هئیییییییییی

چال توتگین دیله گلسین

آزاد نغمه ن ائله گلسین

چال توتگین دیله گلسین

آزاد نغمه ن ائله گلسین

سورولری چوخالد بسله

قولخوزوندا سن هوسله

آی چیخاندا ائلی سسله

هئیییییییییی

چال توتگین دیله گلسین

آزاد نغمه ن ائله گلسین

چال توتگین دیله گلسین

آزاد نغمه ن ائله گلسین

یوردوموزون قهرمانی

آزاد ائلین خان چوبانی

آلقشلا گل بو دؤرانی

آلقیشلا گل بو دؤرانی